O Palacio dos Deportes de Riazor acolleu na noite deste venres 5 de xullo a tradicional Cea do Deporte coruñés, na que o RC Deportivo foi premiado pola súa traxectoria na temporada 2023-2024 e o capitán branquiazul Lucas Pérez recibiu o recoñecemento ao deportista herculino do ano.
O RC Deportivo recibiu o premio polo dobre ascenso dos seus primeiros equipos masculino, a Segunda División, e feminino, á máxima categoría nacional. Lucas foi recoñecido como deportista coruñés do ano grazas á súa gran campaña individual e coral co Dépor.
Ao acto, co que se puxo punto e final ao curso 2023-2024 das actividades deportivas do Concello da Coruña, acudiron o '7' deportivista e, en representación do Club, os conselleiros Carlos Ballesta e Vicente Fernández.
A gala serviu para recoñecer ás persoas e clubs máis destacados nos últimos doce meses, así como aos usuarios das Escolas Deportivas Municipais (EDM). O consistorio herculino entregou outros 17 recoñecementos a entidades, adestradores, colexiados e persoas usuarias das EDM.
