Óscar Gilsanz estréase mañá luns 11 de novembro en ABANCA-RIAZOR coa visita da SD Eibar, fixada para as 20:30 (LaLiga TV Hypermotion).
O destino do fútbol quixo que o técnico canteirán estivese o pasado 15 de setembro no estadio dirixindo ao Fabril no seu partido ante a SD Compostela e que apenas dous meses despois regrese a ABANCA-RIAZOR á fronte do primeiro equipo na súa volta ao fútbol profesional.
En rolda de prensa, confesou que a semana foi "con tranquilidade e con normalidade, sabendo que cada semana pode cambiar ese tipo de situacións. A normalidade do día a día, a normalidade do traballo de vir a Abegondo todos os días coa firme convicción de que no traballo é onde está a mellora de cada unha das prestacións de todos, tanto do corpo técnico, dos xogadores e do equipo no seu conxunto. E con esa normalidade. Tampouco quero ir máis aló nese sentido, senón tratar todo isto coa normalidade que ten".
E quere un Dépor "moi ofensivo, que sexa capaz de atacar, que sexa capaz de xerar situacións en campo contrario, que sexa capaz de aproveitar a calidade dos nosos futbolistas de ataque e que á vez non perda equilibrio e sexa capaz de cando o rival teña o balón mostrarse forte defensivamente. Nese equilibrio é onde está sempre o rendemento. Tratamos de non perder o que o equipo ten en ataque e de fortalecernos defensivamente cando a ocasión o requira".
Os Nosos chegan ao choque pecha a xornada 14ª con 13 puntos na 18ª posición.
O equipo realizou esta mañá última sesión de traballo en Abegondo cunha activación con roldo no centro do campo; e un último ensaio do plan de partido.
Son baixa por lesión Jaime, Ximo Navarro, Jose Ángel e Mfulu.
Ao longo da mañá deste luns, Óscar Gilsanz dará a lista de convocados para o partido.
O RC Deportivo solicitou á RFEF que Yeremay, citado para incorporarse á concentración da selección española sub-21 mañá luns ás 17:00 para disputar dous partidos amigables, atrase unhas horas a súa chegada para que poida xogar ante a SD Eibar.
Na súa comparecencia ante os medios informativos, Óscar Gilsanz lembrou un precedente "hai un mes escaso. O Málaga CF puido contar con Antoñito aquí en ABANCA-RIAZOR nunha convocatoria da selección".
Pola súa banda, a SD Eibar, que a pasada fin de semana perdeu en Ipurúa (0-2) co Elche CF, é 11º con 18 puntos.
Lonxe do seu estadio esta temporada os armeros gañaron ao Albacete Balompié (0-1); empataron co Real Racing Club (2-2) e UD Almería (2-2); e caeron co Real Oviedo (1-0), CD Mirandés (1-0) e Málaga CF (1-0).
Josebe Etxeberría ve o partido de ABANCA-RIAZOR como unha "oportunidade para cambiar a dinámica" despois de 2 derrotas consecutivas: "Cando estás nunha dinámica mala pode ser reflexo o primeiro tempo do Elche CF. O equipo mereceu máis, as que tivemos non conseguimos acertalas e o Elche CF con pouco fíxonos moito dano".
Pide aos seus "seguir insistindo, mellorando eses detalles porque aínda que poidan parecer pequenos, cando estás nunha dinámica así perdes por este tipo de situacións".
Quere un equipo "moi competitivo, confiar no traballo. O feito de poder gañar o luns fronte a un gran rival e nun escenario como ABANCA-RIAZOR pódenos cambiar a perspectiva, a dinámica, a confianza".
Finalizado o encontro, Os Nosos adestraranse de novo o martes 12 de novembro ás 11:00 en Abegondo.
