A pretemporada do Dépor vai collendo ritmo conforme pasan os días. Así, Imanol Idiakez dispuxo esta mañá en dous campos un roldo, un xogo de posición e fútbol en espazo reducido, de alta intensidade.
Sergio Escudero viviu a súa primeira xornada como xogador do Dépor após formalizarse onte a súa incorporación ao Club para as 2 próximas temporadas.
O novo lateral zurdo deportivista traballou por primeira vez esta mañá na Cidade Deportiva co readaptador do primeiro cadro, Fernando Rodríguez. O obxectivo é que aos poucos o futbolista valisoletano vaia collendo ritmo para porse á altura dos seus novos compañeiros, que xa levan varias sesións de vantaxe.
Ademais de Sergio Escudero, Raúl Alcaina está con adestramento individual; mentres que Jose Ángel xa realiza parte das tarefas co grupo.
Pola súa banda, Hugo Ríos, Nájera, Pablo García e Kevin Sánchez foron os representantes de #ANOSACANTEIRA.
Mañá sábado o Dépor conclúe a súa segunda semana de pretemporada cun último adestramento a partir das 10:30 en Abegondo.
