Ídolos branquiazuis de todos os tempos serán os protagonistas de dúas emocionantes tardes desta semana en ABANCA-RIAZOR, coincidindo cos dous primeiros partidos de pretemporada do Dépor.
Mañá martes 1 de agosto, con motivo do Memorial Arsenio Iglesias, a familia do mítico xogador e adestrador branquiazul fará o saque de honra nun tributo máis que merecido cara á súa traxectoria.
Ademais, no descanso do amigable ante o Atlético Arteixo, Lionel Scaloni, un dos ex futbolistas máis queridos e que presumiu do seu deportivismo mesmo no pasado Mundial de Qatar, no que quedou campión con Arxentina, recibirá no céspede de ABANCA-RIAZOR unha cariñosa homenaxe do Club e por suposto de #ANOSAFORZA.
O sábado 5 de agosto, 15 minutos antes de que empece a LXXVIII edición do Trofeo Teresa Herrera entre o Deportivo e o Red Bull Bragantino, Bebeto e Mauro Silva poderán comprobar o enorme agarimo que #ANOSAFORZA profésalles despois de tantas tardes de gloria por España e Europa defendendo a camiseta branquiazul; sendo ademais os dous únicos futbolistas na historia do Dépor que foron campións do mundo mentres xogaban na Coruña.
Xa cos dous equipos formados no céspede, gardarase un respectuoso minuto de silencio por outro coruñés e deportivista universal, Luis Suárez, recentemente falecido.
E para concluír, no tempo de descanso desta edición do decano dos torneos estivais, Álex Bergantiños, un dos grandes capitáns na historia do Dépor, saltará ao céspede de ABANCA-RIAZOR para recibir o recoñecemento de #ANOSAFORZA pola súa dedicación ao Club durante as últimas temporadas.
