Deportivo e CD Castellón deciden mañá domingo 2 de xuño en Castalia (21:00 horas, TVG-2 e FEF TV) o campión de Primera RFEF.
Os Nosos arrincarán co 2-1 a favor da ida da Final de Campións do pasado mércores en ABANCA-RIAZOR, con goles de Lucas Pérez e Pablo Martínez.
Imanol Idiakez, en rolda de prensa, advirte que ese partido "se parece un pouquiño aos de Segunda División, con moitas alternativas, moitas ideas e voltas. Na Segunda os partidos cambian 6 veces durante os partidos de dirección. Seguramente vai ser o que nos imos a atopar".
No entanto matiza que "é unha pouquiño trampa porque estamos a final de temporada, hai circunstancias que normalmente non se van a dar, pero a mentalidade, que é algo moi importante, creo que que o equipo a ten e iso é para min un aspecto moi importante".
En caso de empate ao final dos 90 minutos haberá unha prórroga e, de persistir a igualada, lanzamentos desde o punto de penalti.
O Dépor despedirá a temporada coa boa noticia da renovación de Pablo Martínez, que asinou o seu contrato por unha temporada con opción a outra máis. O central francés saíu do campo o pasado mércores baixo os berros da bancada de ABANCA-RIAZOR: 'Pablo queda!'
Pola contra, será o último partido coa camiseta branquiazul de Mikel Balenziaga, que onte en rolda de prensa anunciou que non seguirá o próximo curso na Coruña a pesar de que tiña un ano de contrato. O lateral zurdo deportivista, que xogou un total de 32 partidos, afirmou ante os medios de comunicación que ten ganas de "irme á miña casa, pasar un mes de vacacións alí e ver o que me pide o corpo".
Imanol Idiakez indicou respecto diso que "foi unha honra para todos nós ter a Balenziaga esta temporada aquí. Ensinounos unha chea de cousas que seguramente algúns xa sabiamos ou intuïamos, pero que as puidemos comprobar en primeira persoa. Foi un gran acerto que viñese. Foi unha sorte para nós coñecelo, velo no día a día, ver o exemplo que supuxo para todos un xogador con esa traxectoria e ese comportamento. Darlle as grazas como llas dei persoalmente e desexarlle o mellor, por suposto".
O equipo realizou esta mañá en ABANCA-RIAZOR a última sesión da temporada, xusto antes de subirse ao avión que o trasladará a Castellón, vía Barcelona.
Imanol Idiakez dispuxo nunha asollada mañá unha activación con roldo e un exercicio de fútbol reducido, de alta intensidade.
Non estiveron en ABANCA-RIAZOR Lucas nin Villares, que onte venres participaron no amigable da selección galega ante Panamá en ABANCA-Balaídos. Ambos os futbolistas incorporaranse á concentración en Castellón.
Así mesmo son baixa por lesión para Castalia Hugo Rama, Yeremay, Germán Parreño, José Ángel, Alcaina e Ximo Navarro.
Si está dispoñible Berto Cayarga, á marxe estes días após sufrir unha escordadura de nocello no partido do pasado mércores. O atacante asturiano adestrouse hoxe con normalidade co grupo.
Os canteiráns Rubén López, Martín Ochoa, Kevin Sánchez, Diego Gómez e o cadete Pablo García completan a convocatoria.
Pola súa banda, o CD Castellón encara o choque coa despedida dun dos seus mellores xogadores este curso e tamén ex deportivista, Haris Medunjanin. O internacional bosníaco anunciou en rolda de prensa que se retira despois do encontro.
Dick Schreuder, técnico castellonenco, subliñou que "sente un profundo respecto polo Deportivo. É un moi bo equipo. O adestrador fíxoo moi ben, teñen unha gran afección, igual que nós".
Confesou gustarlle o encontro en ABANCA-RIAZOR aínda que lembra que "cometemos dous erros groseiros e aí estivo o partido".
Finalizada esta Final de Campións, Os Nosos comezan as súas vacacións.
