O Dépor ABANCA cítase mañá domingo 17 de novembro ás 12:00 (Dazn) en ABANCA-RIAZOR co RCD Espanyol en partido correspondente á 10ª xornada de Liga F.
Fronte a fronte estarán as dúas únicas adestradoras da máxima categoría do fútbol feminino nacional: Irene Ferreras e Sara Monforte.
"Considéroa un referente desde a súa etapa no Rayo Vallecano. Fai moi ben as cousas. A liña de traballo a nivel pedagóxico, que a xogadora entenda o que está a facer, ten moito mérito", declarou a preparadora espanyolista da deportivista.
A derrota (0-1) da pasada fin de semana, tamén en ABANCA-RIAZOR, ante a Real Sociedad deixou a As Nosas con 6 puntos na 14ª posición.
En rolda de prensa, Irene Ferreras ve ao seu equipo "adestrando moi ben, traballando moi ben e con bastante equilibrio a pesar dos resultados que van chegando. Estamos a conseguir ser estables nese sentido".
Espera un partido "onde nós imos tratar de xerar cousas con balón contra un Espanyol que non quere ter a pelota tanto, non quere levar o peso do partido desde a posesión".
Quere a preparadora branquiazul mañá "darlle continuidade ao que estamos a facer, buscar precisión nos últimos metros e estar moi atentas nos momentos de perda para que nos corran o menos posible".
Causa baixa para o partido a gardameta Yohaha Gómez, afectada dun neumotórax que o terá varias semanas á marxe do grupo.
Completan a convocatoria as canteirás Michi Apóstol, Elena Vázquez e Martina Rivas.
Pola súa banda, o equipo catalán, que a pasada fin de semana venceu no seu campo (1-0) ao Granada CF, é 11º con 9 puntos.
Lonxe do seu campo, o RCD Espanyol esta temporada aínda non coñece a vitoria posto que empatou co Real Betis Féminas (0-0); e perdeu co Madrid CFF (2-1), FC Barcelona (7-1) e Sevilla FC (1-0).
Sara Monforte, en rolda de prensa, advirte que "xogar ante rivais directas é determinante de cara ao final de liga. Se ti ganas, o rival non puntúa e iso é moi importante".
Finalizado o encontro As Nosas adestraranse de novo en Abegondo o luns 18 ás 11:00 horas.
