O Fabril e o Coruxo FC cítanse mañá domingo 10 de decembro ás 19:30 en Abegondo (Youtube RC Deportivo) en partido correspondente á 15ª xornada no grupo 1º de Segunda Federación.
Ambos os conxuntos chegan ao encontro igualados na zona media da clasificación de Segunda Federación a 17 puntos, o Fabril após caer en Guijuelo (1-0) e o Coruxo FC co seu triunfo (2-1) en O Vao ante o potente Ourense CF.
Ao longo desta semana varios fabrilistas xogaron un papel importante no partido do primeiro equipo de Copa del Rey, caso de Rubén, Mella ou Kevin; con Marc, Jairo, Marotías e Martín Ochoa tamén citados por Imanol Idiakez para esa cita.
Pérdense o partido por lesión Diego Gómez, Puerto, Quique Teijo e Thymos, este a consecuencia dunha escordadura no seu xeonllo dereito.
Óscar Gilsanz agardará polos fabrilistas que están citados co Dépor para tamén mañá domingo ás 16:00 recibir en ABANCA-RIAZOR ao Sestao River: Martín Ochoa, Mella, Rubén, Kevin, Marc Lachèvre e Óscar Marotías; así como ao partido desta tarde do Xuvenil A en Oviedo.
En rolda de prensa, explica que "non hai unha folla de ruta de cada xogador cando se achega ao máximo nivel ou neste caso ao seu máximo nivel no primeiro equipo. Cada xogador ten un ritmo, un proceso formativo, madurativo; e se cadra o que vale para un igual non vale para outro xogador. Hai que ir vendo cada caso, cada circunstancia e por iso sempre falo de paciencia; sobre todo para a que teñan eles tamén, para que teñan paciencia necesaria que lles permita seguir traballando e aos adestradores seguirlles esixindo".
En canto ao Coruxo FC, lonxe da súa casa esta temporada caeu (3-2) en Langreo, Guijuelo (2-0), Zamora (2-0), Oviedo (2-0), en Santander co Rayo Cantabria (2-1) e en Santiago (1-0); e unicamente gañou á Arandina CF (0-1).
No entanto, o adestrador fabrilista advertiu onte que o conxunto vigués "vén en moi boa dinámica e con moita confianza". De feito, liquidaron con triunfo os seus 4 dos seus 5 últimos partidos.
David de Dios, técnico do Coruxo FC, asegurou que "temos moi claro o que temos que facer e notouse o outro día na primeira parte. Quizais na segunda o Ourense CF tirouse sobre nós porque era un 2-0 e tiñan que facer algo diferente pero era a sensación que queriamos no rival e vénnos ben para o futuro".
Do Fabril, apuntou que "é un filial que trata moi ben o balón, con moita velocidade. É verdade que está a pasar unha fochanca que é normal porque o pasamos todos. Contra un filial todo é impredicible. Pode saír cara e pódenche esnaquizar ou ao contrario ti pódeslle gañar. Pode pasar calquera cousa".
O Club mantén activo o protocolo de apertura con rexistro de asistentes da Cidade Deportiva de Abegondo para o encontro.
Poden retirar entradas dispoñibles, até esgotar aforamento e sen ningún custo adicional, todos os socios e socias do RC Deportivo que o tramiten formalmente a través da web bancada.rcdeportivo.es, na que deberán introducir a súa ID de socio e os 4 últimos números do DNI. A continuación, seleccionar unha localidade libre na bancada e posteriormente completar os seus datos de contacto e a dirección de correo electrónico onde recibir a entrada.
Con eses mesmos datos doutras persoas socias, unha única pode retirar máis dunha entrada nunha soa xestión e, deste xeito, seleccionar asentos contiguos ou próximos.
Este procedemento ten dous fins: poder solicitar e recibir a entrada e, ademais, levar un control de repartición e localización na instalación.
O RC Deportivo solicita que unicamente tramiten a entrada aqueles socios e socias que vaian poder acudir aos partidos, para evitar que queden afeccionados sen poder asistir unha vez completado a repartición do aforamento nun proceso 100 % telemático.
Tamén está habilitado simultaneamente o sistema de venda de entradas para o público en xeral, a través da mesma plataforma en bancada.rcdeportivo.es e seguindo o preceptivo sistema de rexistro e pago de localidade. O prezo de cada entrada para afeccionados sen carné do RC Deportivo é de 10 euros.
