Fernando Soriano, Director Deportivo, subliña que na temporada que agora conclúe "foi moi significativa esa piña, esa unión do grupo nos momentos difíciles; e logo por suposto a axuda da nosa xente, de #ANOSAFORZA. Foi incrible. Desde o primeiro momento até o final nunca deixaron ao equipo só. O Dépor sempre estivo acompañado en todos os sitios, en ABANCA-RIAZOR. E é moito máis fácil saír deses momentos delicados con ese apoio".
Resalta tamén que "a conexión corpo técnico-xogadores-afección foi a clave máis importante para conseguir o éxito".
Lembra da temporada momentos clave nos que "o equipo rexorde ao final dos partidos cun gol importante: CD Arenteiro ou Barcelona; levantarse despois de Irún, nun partido no que o equipo non estivo ben; e chega o mes de xaneiro no que o equipo colle esa dinámica e logra mantela".
De cara a esta próxima temporada en Segunda División Fernando Soriano opina que "máis da metade do equipo está formado. Temos unha boa base e a partir de aí todo o que vexamos importante para mellorar, sen descompor o grupo e que sexa para mellorar o rendemento no campo valorarémolo. Algún reforzo vai haber".
Con todo iso albisca un escenario futuro "bonito. Saímos do concurso de acredores, un club cunha previsión dun proxecto importante non só a nivel de primeiro equipo masculino senón tamén feminino. Tamén en Abegondo unha reestruturación para mellorar se cabe aínda máis o rendemento dos nosos rapaces. É un proxecto moi bonito no que debemos de remar todos na mesma dirección".
