Fran Alonso compareceu esta mañá na sala de prensa de Abegondo como previa do seu encontro de oitavos de final de Copa de la Reina fronte á Real Sociedad de mañá domingo ás 12:00 (YouTube RFEF) en Abegondo. O míster confía en pasar de rolda a pesar de valorar á Real como favorito: "Imos porlle ganas, porlle ilusión e tentar pasar de rolda".
Respecto ao rival, Fran espera a un "equipo moi agresivo, van estar frescas, seguro que nos estudaron moi ben". A pesar de ter menos tempo de descanso polo partido intersemanal, o técnico confía en poder facer un bo encontro e "mañá se cadra veremos algunha cara nova porque confiamos no grupo".
No referente ao mercado de inverno, Fran apunta que "estamos a estudar algunha posible incorporación".
Doutra banda, tamén confirma que sente cómodo xogando cunha formación de tres centrais: "Sentimos cómodas con esa formación". Con todo, tamén considera que hai que adaptarse a cada partido e ser un equipo "camaleónico".
Finalmente, aproveita para enxalzar a figura de Henar e alégrase encarecidamente da recente renovación de Ainhoa: "Énchenos de orgullo que ela decida quedar aquí". "Moi contento por ela e moi contento por nós", engade.