O Xuíz Único de Competicións non Profesionais da RFEF, Rafael Alonso Martínez, comunicou que as dúas últimas xornadas no grupo 1º de Primera Federación, correspondentes ao Real Sociedad B - Deportivo (sábado 18 de maio) e o Deportivo - Real Unión de Irún (sábado 25 de maio), xogaranse en horario unificado ás 19:00 "naqueles encontros cuxos resultados poidan ter transcendencia na determinación dos postos de ascenso directo (1er clasificado), clasificación para o play off de ascenso a Segunda División ou posto definitivo entre os participantes na mesma (postos 2º ao 5º), descenso a Segunda Federación (postos do 16º ao 20º) así como a participación noutras competicións da RFEF".
O Dépor marcha como líder con 61 puntos por 58 do FC Barcelona Atlètic, 2º na táboa. Por detrás veñen o Nástic de Tarragona (57 puntos), Celta Fortuna (54 puntos) e SD Ponferradina (53 puntos).
