Irene Ferreras manifestou esta mañá na sala de prensa de Abegondo que "noto ao meu equipo moito máis maduro, moito máis pendente do noso e non tanto dos rivais".
Con 7 partidos gañados e só 1 perdido na que vai de liga, cre que "é curioso con estes resultados estamos aí varios equipos pegados. Vai haber momentos para todo. Non sei o que vai pasar no futuro pero si sei que temos que aproveitar o bo momento para seguir sumando de 3 en 3 se pode ser e chegar aos puntos que nos permitan o ascenso".
Do rival deste sábado en Abegondo (12:00, Youtube RC Deportivo), o FC Barcelona B, advirte que "é un dos máis complicados da categoría. É o mellor momento para demostrar o equipo que somos. Imos ir coa ambición de querer gañar os 3 puntos sabendo que vai haber momentos para todo; e querendo crecer cada día. Temos que mirar sempre á mellora e non conformarnos co que xa fixemos, que até o momento foi bo; pero o equipo necesita seguir traballando, seguir querendo máis e desa forma seguir afrontando os momentos que vaian vindo".
Asegura que "estamos a preparar o partido desde a seriedade a nivel defensivo, desde a personalidade a nivel ofensivo. Temos que preocuparnos de nós e iso non quere dicir descoidar a faceta defensiva porque o Barça practica un fútbol moi combinativo, con moito talento individual, que xera moito desequilibrio tentando atopar esa xogadora libre mediante a combinación ou o propio duelo".
A adestradora deportivista recalca que o Dépor ABANCA "vén traballando para partidos así durante moitas semanas. Isto non é froito de só preparar este partido estes días que tivemos senón que xa vimos coa mente posta en que podía ser un dos rivais a bater e en que nos ía a esixir".
Pide ao seu xogadoras "convencemento para poder facerlles dano. O vestiario sente así e aínda encima a nivel anímico estamos nun bo momento para aproveitar esas boas sensacións no campo e a nivel mental dar ese pasiño adiante".