Laura Otero Fuertes (Santiago de Compostela, 15 de xuño de 2006) renovou por unha temporada co Deportivo ABANCA B.
A dianteira santiaguesa acaba de pechar a súa cuarta temporada como deportivista, xa que se incorporou á disciplina branquiazul ao comezo da campaña 2020-2021, nas filas do Orzán SD Cadete, procedente do Villestro SD.
No curso 2021-2022 compaxinou actuacións co Orzán SD Xuvenil e o Dépor ABANCA B, ao que xa se incorporou permanentemente ao comezo da temporada 2022-2023. Co segundo equipo deportivista, Laura Otero xogou 83 partidos, 63 deles como titular, nos que anotou 37 tantos.
Habitual nas seleccións galegas de categorías inferiores, foi unha das máximas goleadoras do filial nas dúas últimas temporadas e foi unha das xogadoras destacadas no recente Torneo Xuvenil Feminino de España, no que anotou un dobrete no partido fronte ao Madrid CFF.
