O Dépor ABANCA, líder de Primera Federación Iberdrola con 6 puntos de vantaxe xa sobre o RCD Espanyol, non quere perder ritmo competitivo nestas dúas semanas sen liga.
Así, As Nosas disputaron un amigable ante o Athletic Club de Liga F hoxe xoves na localidade leonesa de Astorga.
O triunfo (1-0), de pompa ao tratarse o rival dun dos equipos históricos do fútbol feminino español, foi deportivista grazas a un gol de Millene, unha das dianteiras de moda en España.
Estreáronse no once, e a gran nivel, a internacional venezolana 'Michi' Apóstol, que xa xogou e marcou 4 goles co filial en Tercera Federación FutFem; e Lucía Martínez, xa recuperada da súa lesión que lle impediu estar a disposición de Irene Ferreras desde a súa chegada a Abegondo no último mercado de inverno.
Pola súa banda, o Athletic Club chegaba a este test após derrotar o pasado sábado 17 de febreiro ao Real Betis Balompié (1-0) no campo 2 de Lezama. As branquivermellas son oitavas na táboa con 26 puntos.
O encontro foi especial para a ex deportivista Peke, xogadora que marcou unha época na Coruña coincidindo co ascenso á máxima categoría do conxunto branquiazul.
No conxunto vasco, Nerea Nevado, Elexpuru, Maite Zubieta, Arana, Sara Ortega, Jone Amezaga, Nanclares e Pinedo perdéronse o choque debido aos compromisos internacionais.
A primeira parte foi de dominio alterno con repartición de ocasións.
A branquivermella Sanadri tivo a primeira do partido, aos 2 minutos, pero o seu remate foise por encima do traveseiro.
Respondeu no outra área a central deportivista Raquel, pero o seu balón acabou nas mans da porteira rival.
Michi Apóstol gozou un man a man coa gardameta do Athletic pero a acción estaba invalidada por fóra de xogo.
Á media hora chegou o tanto do partido. Millene resolve de vaselina desde 25 metros nunha gran acción de calidade.
Após o paso polos vestiarios o choque seguiu coa mesma tónica, a pesar do carrusel de cambios nos dous equipos.
O máis destacado no Dépor ABANCA foi unha cabezada de ADT lixeiramente desviado a centro de Charle.
Nos minutos finais, As Nosas permitíronse ademais a licenza de xogar con 4 canteirás sobre o campo: Paula Novo, Lucía Rivas, Carmen Carballada e Paula Monteagudo.
Deportivo ABANCA: Yohana, Samara (Cris Martínez, min. 50), Inés Altamira (Paula Novo, min. 46), Raquel, Sara Debén (Clara, min. 69), Henar (Carmen Carballada, min. 69), Lucía Martínez (Eva Dios, min. 32), Carlota (Ainhoa Marin, min. 46), Lía (Laurina, min. 46), Michi Apóstol (Marta Charle, min. 32 e Lucía Rivas, min. 69) e Millene (ADT, min. 46 e Paula Monteagudo, min. 69).
Finalizado este amigable, As Nosas comezarán unhas mini vacacións, posto que haberá descanso venres, sábado e domingo para o cadro.