O Deportivo buscará mañá domingo 5 de novembro en Irún ante a Real Unión (16:00, FEF TV), en partido correspondente á 11ª xornada, a súa terceira vitoria consecutiva en liga após as cultivadas en Sabadell e en ABANCA-RIAZOR fronte ao Nàstic de Tarragona.
A elas hai que sumar o triunfo copeiro do pasado mércores en Langreo ante o CD Covadonga nun partido cuxo desenlace foi na prórroga.
Imanol Idiakez, na rolda de prensa post-partido en Ganzábal, subliñou que "facer un espírito de equipo gañador sempre é importante".
Tamén ante os medios de comunicación, Pablo Vázquez está convencido que o empate en Ponferrada, con 10 xogadores no campo desde o minuto 10, é "un punto de inflexión porque sentía así, porque se puxo todo peor imposible outra vez; e ese premio que obtivemos nun dos campos máis complicados sóubonos a gloria e eu tamén sabía que ese ía ser un punto no que ía cambiar todo e por sorte está a conseguirse".
Os Nosos chegan a esta cita na 11ª posición da táboa do grupo 1º de Primera Federación con 14 puntos.
Pérdense o partido por lesión Yeremay, Barbero, Pablo Muñoz e Mella.
Por contra, Jairo, Martín Ochoa e Rubén López serán os representantes de #ANOSACANTEIRA.
De Jairo, titular en Copa en Langreo, o técnico deportivista manifestou onte que "é un xogador que no que todos temos moita fe e que evidentemente sabe que partidos como o do outro día véñenlle fenomenal. Debería de xogar moi a miúdo en escenarios así, porque é o que lle falta. Ten moito talento, ten calidade coa pelota e ten unha mellora aí no sen balón, nos duelos, no aéreo. Estamos niso e estamos convencidos que está no camiño porque sobre todo ten o máis importante, que é que quere. E cando queres pódense conseguir as cousas".
E de Martín Ochoa, Imanol Idiakez subliñou que viviu o seu pase ao primeiro equipo "con moita naturalidade. A parte boa que me atopo en moitos dos mozos é que llo toman con absoluta naturalidade a oportunidade. É verdade que desde que chegamos nós no verán son parte activa do día a día moitos deles. Iso tamén lles axudou a sentirse cómodos. Martín está con naturalidade, traballa todos os días, traballaba cando xogaba menos, traballa agora que xoga máis e é unha alegría, é unha das nosas apostas e estamos moi contentos; pero non fixemos nada, temos que seguir apertando, mellorando, traballando porque en procesos de xente tan nova sempre hai altibaixos e temos que entender que haberá días bos e menos bos".
Con varios centos de afeccionados deportivistas nas bancadas do Stadium Gal, ao preparador branquiazul "hai tempo" que se lle acabaron os cualificativos: "É outra categoría. #ANOSAFORZA é o noso gran tesouro e o domingo imaxinádevos as ganas que temos de que, a todos os afeccionados deportivistas que se pegan semellante malleira para ir animarnos, poidan volver de Irún cunha alegría. Imos facer todo o posible para que así sexa".
O Dépor realizou esta mañá un último adestramento en Abegondo cunha activación, rondos, un xogo de posición e un ensaio de accións a balón parado para concluír. Ao finalizar, os 22 convocados desprázanse a Irún, vía Bilbao.
Así mesmo, a Real Unión chega ao choque após caer a pasada fin de semana en Lugo (2-0). O equipo que dirixe o galego Fran Xusto, ex técnico do CD Arenteiro e do CD Lugo, marcha na 8ª posición con 16 puntos.
No seu campo do Stadium Gal, os irundarras non coñecen a derrota: gañaron á CE Sabadell FC (2-1), ao CF Rayo Majadahonda (4-0) ao CD Teruel (3-2) e á SD Tarazona (1-0); e só cederon un empate coa SD Ponferradina (1-1).
En rolda de prensa, Fran Xusto cualificou o partido como "un partidazo. Ten que ilusionar a todo o mundo, a nós evidentemente ilusiónanos moito; pero tamén ten que ilusionar moito á xente. Probablemente non teñamos o mellor tempo en canto ao metereológico pero somos un equipo que estamos a facer moi ben as cousas en Gal, somos o mellor equipo da categoría como locais e a nosa intención é darlle continuidade a isto".
O técnico galego pensa que o Dépor é "probablemente o mellor cadro do grupo pero nós estamos a facer as cousas ben, estamos a demostrar moi bo nivel, sobre todo como locais. Pasa por aquí parte do noso obxectivo aínda que si temos que subir o nivel e sobre todo a regularidade".
Conclúe que "estamos moi ilusionados en facer un bo partido diante da nosa xente, que ademais seguro que van tentar dar un paso adiante como no partido ante a Ponferradina para tentar axudarnos".
Finalizado o choque, o Dépor regresa por estrada á Coruña e adestrarase de novo o martes 7 ás 16:30 en Abegondo.
