O Deportivo goleou ao CD Castellón no seu estadio no encontro de volta da Final de Campións, co que se proclamou campión de Primera Federación 2023-24.
O encontro comezou coa saída en tromba do CD Castellón. O equipo blanquinegro dispuxo dunha clara oportunidade aos 38 segundos de xogo. Eric Puerto evitou o gol ao gañar o man a man con Raúl Sánchez, desviando a córner. No minuto 2, Óscar Gil cabeceou lixeiramente alto o segundo saque de esquina consecutivo a favor do conxunto local, que se adiantou no marcador no minuto 4. Centro de Suero desde a dereita e chegada de Douglas desde atrás para cabecear ao bordo da área pequena superando a Eric Puerto.
O CD Castellón dispuxo doutra clara opción no minuto 11, pero o zurdazo de Douglas estrelouse no lateral da rede despois de cruzarse Paris Adot e desvialo lixeiramente.
A primeira ocasión clara do Dépor chegou no minuto 20 a balón parado. Dani Barcia cabeceou unha falta colgada por Lucas e Crettaz rexeitou o esférico nunha áxil intervención. O empate produciuse no minuto 28. Lucas recibiu en tres cuartos un sensacional pase en profundidade de Davo após un erro no control de Vertrouwd e definiu cunha sutil culler ante a saída de Crettaz para empatar o partido.
Volveu empuxar a formación blanquinegra nos minutos finais da primeira parte. No minuto 42, Óscar Gil cabeceou moi alto chegando desde atrás a centro de Vertrouwd. E no 44, Suero dispuxo dun novo man a man ante o que Eric Puerto respondeu cun novo paradón.
Despois de moitos minutos aguantando a ofensiva castellonenca, o Dépor inventouse un rápido contragolpe cando se cumpría o minuto 45. Lucas e Mella quedaron sós ante o defensa local Chirino, e o capitán pasou o coiro dentro da área ao canteirán que bateu con comodidade a portería local. Foi o sétimo tanto liga do '3' branquiazul e a súa novena diana da temporada, que colocaba o 4-2 no global da eliminatoria.
Puido ampliar a súa vantaxe o Deportivo no tempo engadido, despois dunha internada de Davo, cuxo disparo acabou estrelándose no lateral dereito da rede da portería castellonenca.
A segunda metade comezou co Dépor abrindo brecha no marcador. No minuto 48, Lucas trianguló con Diego Villares e definiu cun zurdazo cruzado para bater de novo o marco local. Cos seus dous tantos de hoxe, o capitán branquiazul alcanza os 15 goles en Liga, 16 na temporada e 58 en partidos oficiais co Dépor, que o sitúan empatado con Riki no 17º posto do ranking histórico.
Con todo, a ampla vantaxe durou soamente cinco minutos, posto que no 53 Suero marcou a porta baleira após un veloz contragolpe conducido por Alberto e asistencia final de Veldwijk.
O CD Castellón seguiu xogando con valor, o que lle axudou a xogar permanentemente preto da área coruñesa pero tamén axudou a xerar importantes opcións ao contragolpe para o Deportivo. No minuto 56, chegou unha veloz transición pola dereita entre Lucas e Davo, que conectou en profundidade para Mella, cuxo remate ao entrar na área, en situación moi vantaxosa, foise ás nubes.
Só tres minutos despois, Eric Puerto arrebatou o coiro no punto de penalti a Douglas, só na área após un pase de Óscar Gil. No minuto 63, un durísimo zurdazo desde a frontal da área de De Miguel controlouno o porteiro deportivista en dous tempos.
Mella tivo a opción de abrir brecha no minuto 67, cando se internou pola esquerda. O canteirán preferiu lanzar a porta cando tiña un pase atrás moi claro para Lucas. Alberto cruzouse ante o seu zurdazo para desviar o coiro a saque de esquina. No minuto 73, Davo estrelou no pau esquerdo do marco local un dereitazo potente desde fóra da área. Pero o asturiano atopou o premio só uns segundos despois, ao marcar a porta baleira a pase de Lucas, que se aproveitou dun erro de Alberto. Foi o oitavo gol da temporada para o '11' branquiazul.
Con tres goles de desvantaxe no global da eliminatoria claudicou o CD Castellón, que apenas tivo capacidade de resposta no cuarto de hora final. O marcador non se volveu mover e o Dépor conquistou o trofeo de campión da categoría por un resultado total de 6-3. Deste xeito, o equipo branquiazul é o único que ostenta nas súas vitrinas os trofeos de campión da primeira, segunda e terceira categorías do fútbol español.
CD Castelló: Crettaz, Raúl Sánchez, Alberto (Borja Granero, min. 80), Chirino, Vertrouwd (Veldwijk, min. 46), Suero (Manu Sánchez, min. 80), Óscar Gil, Moyita, Douglas, Medunjanin (Iosifov, min. 71) e De Miguel (Punzano, min, 90).
RC Deportivo: Eric Puerto, Paris Adot (Iano, min. 80), Pablo Vázquez, Dani Barcia, Pablo Martínez (Balenziaga, min. 86), Salva Sevilla, Jaime, Diego Villares, Davo (Rubén López, min. 80), Lucas (Kevin, min. 90+1) e Mella (Pablo Valcarce, min. 86).
Goles: 1-0 Douglas (min. 4); 1-1 Lucas (min. 28); 1-2 Mella (min. 45); 1-3 Lucas (min. 48); 2-3 Suero (min. 53); 2-4 Davo (min. 74).
Árbitro: Abraham Domínguez Cervantes (c. andaluz). Cartón amarelo a Vertrouwd (min. 19), Dani Barcia (min. 24), Jaime (min 46), Alberto (min. 63), Raúl Sánchez (min 82) e Rubén López (min. 88).
Incidencias: partido de volta da Final de Campións de Primera Federación disputado no Estadio Municipal de Castalia.
