O Dépor impúxose (2-5) esta noite nun gran partido ao Albacete Balompié no Estadio Carlos Belmonte, en partido correspondente á 7ª xornada en LaLiga Hypermotion. Os deportivistas fixeron valer a súa gran pegada cun Mella e Yeremay excelsos.
Os branquiazuis chegaban ao choque após a derrota a pasada fin de semana ante o Burgos CF en ABANCA-RIAZOR nun partido decantado para os casteláns nun erro defensivo branquiazul nos instantes finais.
Pola súa banda, o Albacete Balompié, no que milita o ex deportivista Quiles e con outro ex deportivista, Toché, como Director Deportivo, regresaba ao seu estadio após vencer a pasada fin de semana con claridade na Malata (1-4).
Ambos os equipos víronse as caras por última vez hai 3 temporada en ABANCA-RIAZOR no play off de ascenso a Segunda División, que naquela ocasión sorriu aos manchegos (1-2). Dani Barcia, o central coruñés que aquel fatídico día viu o partido na bancada, admite que "ese día nos afectou moitísimo a todos os deportivistas".
Imanol introduciu dous cambios no once respecto ao citado partido ante os burgaleses.
Un deles foi obrigado. A lesión de Bouldini no glúteo medio deixou paso a Barbero na punta de ataque.
A maiores, Mfulu estreábase como titular na sala de máquinas deportivista en substitución de Jose Ángel. "A realidade é que temos moitos xogadores que chegaron tarde, coa pretemporada empezada algúns, outros coa liga empezada, e estámolos incorporando sobre a marcha. Para saber o potencial tes que polos. Mfulu ten unha gran experiencia. Vén dunha pretemporada con poucos minutos e aos poucos estase pondo en forma. Fixo un buenísimo traballo", explicou Imanol Idiakez na sala de prensa.
O primeiro disparo foi coruñés. Mfulu, aos 2 minutos, xutou desde a frontal e o balón márchase alto após tocar nun defensor.
Pero o que golpeou primeiro foi o Albacete. No primeiro saque de esquina do partido para os locais Quiles, libre de marca, remata no corazón da área ao pau dereito de Helton, inalcanzable para a meta brasileiro.
"Empezou o partido da peor maneira. Era difícil empezar peor. Un gol a balón parado nada máis empezar, a primeira practicamente", comentou Imanol Idiakez na sala de prensa.
O gol non descompuxo ao Dépor, que logrou empatar aos 9 minutos nunha xogada por banda esquerda que acaba no lado contrario, onde non perdoa Mella.
O tanto subiu ao marcador con suspense por unha revisión de VAR por posible fóra de xogo.
Pouco despois, noutro balón roubado no inicio do xogo da 'Alba', Yeremay recibe de Barbero e de tiro raso bate a Rivero. En apenas 2 minutos o Dépor xa estaba diante no marcador por primeira vez desde o encontro ante o Racing de Ferrol na xornada 3ª.
O preparador deportivista mostrouse "contento porque a reacción do equipo foi de mérito. Os xogadores demostraron personalidade, carácter. Estou contento pola reacción e polo traballo de todos".
En vantaxe, Os Nosos pasaron a controlar o partido con só unha mala noticia, os cartóns, quizais rigorosas, a Dani Barcia e Obrador por faltas en dúas transicións albaceteñas.
Noutra gran contra levada entre Yeremay, Lucas e Mella, leste centra ao segundo pau e Barbero, libre de marca, non chega por pouco. Corría o minuto 30 e a punto estivo o Dépor de incrementar a súa renda.
Rivero evita o terceiro do Dépor na recta final do primeiro tempo nunha veloz contra resolta por Mella. O meta manchego desviou a saque de esquina.
Lucas, dous minutos máis tarde, tenta colocar un disparo desde a frontal. O balón márchaselle alto ao capitán deportivista.
O partido era do Dépor. Yeremay, con todo a favor e libre de marca, perdoa na frontal da área pequena un pase atrás de Ximo Navarro.
A bancada do Carlos Belmonte empezouse a impacientar cos seus, incapaces de crear perigo á portería de Helton.
O primeiro tempo acabou con susto para o Dépor nun par de transicións rápidas do Albacete e un remate de cabeza de Medina a un saque de esquina que se foi lamiendo o pau dereito da portería deportivista; e cun gol anulado por fóra de xogo a Barbero noutra contra deportivista.
A segunda metade arrincou cos mesmos 22 protagonistas que iniciaron o partido.
Ximo, após recibir no segundo pau, remata ao lateral da rede no minuto 56. Era a primeira ocasión deportivista na continuación.
Lucas, pouco despois, xuta ás mans de Rivero nunha boa acción individual.
O Dépor aumenta a súa vantaxe nunha gran xogada de Yeremay. O atacante deportivista adiántase ao seu par, encara a Rivero e báteo con clase no un contra un.
Alberto González introduce 4 cambios no Albacete para tratar de meter ao seu equipo no partido.
Idiakez, desde o outro banco, reacciona con Cristian Herrera e Mario Soriano por Yeremay e Barbero.
A puntilla do partido foi outra veloz xogada con asistencia de Lucas a Mella, que deixa a pracer para Cristian Herrera.
"É un xogador que ten moi boa relación co gol, vive cara ao gol. Sempre está pendente de buscar espazos, atacar liñas... Cos bos pasadores que temos pódenos dar moitas cousas porque é moi listo e ten unha intuición moi boa para o gol", indicou o adestrador deportivista do atacante canario.
A base de coraxe, o Albacete reduce distancias por mediación de Fidel, nunha xogada con varios rexeites na área. Corría o minuto 76.
Pero Mella, á contra, subía o 2-5 nun man a man ben resolto polo canteirán. O Alba, á desesperada, recibía o golpe definitivo.
Os instantes finais, xa con todo decidido e os 3 puntos amarrados, deixaron o debut de Charlie Patiño no Dépor.
Albacete Balompié: C. Rivero, Álvaro R. (Higinio, min. 67), Juan María (Lazo, min. 67), A. Medina, Ros, Juanma, Riki, Fidel (Nabil T., min. 82), Jon García (Morci, min. 67), A. Meléndez (Javi Rueda min. 67) e Quiles
Deportivo: Helton, Ximo, Pablo Vázquez, Dani Barcia, Obrador (Pablo Martínez, min. 86), Mfulu (Jose Ángel, min. 82), Villares, Mella (Charlie Patiño, min. 82), Yeremay (Mario Soriano, min. 72), Lucas e Barbero (Cristian Herrera, min. 72)
Árbitro: José Luis Guzmán Mansilla, do comité andaluz. Amoestou a Barcia (min. 15), Obrador (min. 17), Riki (min. 35), A. Medina (min. 36) e Fidel (min. 60),
Goles: 1-0 Quiles (min. 5); 1-1 Mella (min. 9); 1-2 Yeremay (min. 12); 1-3 Yeremay (min. 61); 1-4 Cristian Herrera (min. 73); 2-4 Fidel (min. 76); 2-5, Mella (min. 79)
Incidencias: Partido correspondente á 7ª xornada disputado no Estadio Carlos Belmonte con 11.509 espectadores, deles un centenar de deportivistas
