O Estadio ABANCA-RIAZOR acolleu na mañá do pasado sábado 25 de maio o acto de imposición da insignia de Ouro do Club a 13 socias e socios do RC Deportivo que esta temporada cumpren 50 ininterrompidas co seu abono Deportivista.
O acto comezou coa benvida a homenaxeados e acompañantes na Área 1906, antes de dirixirse á Sala de Prensa de ABANCA-RIAZOR, onde se produciu a entrega de diplomas, imposición de insignias e fotos para o recordo xunto aos 7 trofeos oficiais de primeira categoría conquistados polo RC Deportivo. Tanto o presidente do RC Deportivo, Álvaro García Diéguez, como Avelino Pérez Aller, en nome dos homenaxeados ao cumprir 50 anos como socio do Deportivo, tomaron a palabra para dirixirse a todos os invitados.
De aí aos bancos e o terreo de xogo, onde os homenaxeados e os seus acompañantes puideron continuar facéndose fotografías e charlar con algúns dos compoñentes do cadro da súa primeira temporada como socios, o curso 1973-74: Alfonso Castro, Pardo I, Cholo, Cobas, Belló, Piña e Beci.
Todos xuntos dirixíronse ao Restaurante Tira do Playa, dentro do complexo Playa Club, para gozar dun xantar ao que sumáronse Daniel Cuiña, Socio de Platino, e Dagoberto Moll, xogador da súa primeira temporada como abonado. Para finalizar a xornada, regresaron ao Estadio ABANCA-RIAZOR para asistir, desde o Palco de Honra, ao partido entre o RC Deportivo e a Real Unión Club, nun broche perfecto a un día inesquecible após 50 anos xuntos.
Con carné de socio entre os números 303 e 315, un carné que lles permitirá acceder libremente a ABANCA-RIAZOR para sempre, son novas socias e socios de Ouro do RC Deportivo: Jesús Andrés Cabaleiro Méndez, Ramiro Casquero Torre, Luis Ramiro Castro Iglesias, Manuel Enrique Estévez Rodríguez, Ricardo Hortas Iglesias, Fernando Martínez Gómez, Víctor Manuel Meirama Amor, Avelino Pérez Aller, Julio Presedo Gómez, Jesús Francisco Rebollo Capillas, Margarita Rodríguez Sobreira, Enrique Ramón Rosende Pujades e Manuel Santiago Quintero.
