O RC Deportivo continuará o vindeiro domingo 21 de xaneiro, no décimo partido de Liga en ABANCA-RIAZOR, fronte á SD Ponferradina (19:00 horas), coa iniciativa "O Día Dé", coa que abre o Palco de Honra do Estadio á afección e á cidadanía. Este décimo encontro será "O Día Dé A Nosa Casa", en recoñecemento aos profesionais que prestan servizos de forma habitual nos encontros do Dépor en ABANCA-RIAZOR.
Traballadores que prestan servizos en seguridade, limpeza, mantemento de instalacións, hostalaría e hospitality ocuparán medio centenar de prazas do palco principal do recinto, a localidade máis exclusiva e con mellor visibilidade de ABANCA-RIAZOR.
Ademais, nesta ocasión sumaranse a esta invitación unha vintena de Socios de Ouro do RC Deportivo.
En cada partido en ABANCA-RIAZOR esta temporada, máis da metade das localidades do Palco de Honra estarán dedicadas a un colectivo da cidadanía ou a un sector da afección, para facer a entidade máis próxima e dar protagonismo á masa social deportivista e agradecer o seu excepcional apoio unha temporada máis.
