Óscar Gilsanz compareceu esta mañá na sala de prensa de Abegondo antes de recibir mañá sábado 5 de outubro ás 16:00 en Abegondo (YouToube RC Deportivo) á UP Langreo.
Resalta que, a pesar de non ter tanto nome como os dous previos rivais (Pontevedra CF e CD Numancia), "vai ser igual de complicado ou máis". "O ano pasado rozou play off, reforzouse este ano, gañounos os dous partidos 1-0, co que é un equipo difícil de facer gol. Aínda non encaixou fóra da súa casa esta temporada", advirte.
Pide que o Fabril estea "á súa mellor versión. É certo que o traballo dos mozos é bo, o día a día trabállase moi ben. O equipo ten marxe de mellora e vai mellorando aos poucos. Somos optimistas de cara ao futuro en canto ao rendemento pero queremos seguir nesta liña e contra a UP Langreo mostremos unha boa versión aquí en Abegondo".
Finalmente o preparador fabrilista presume dun grupo "moi san, onde rapidamente os xogadores encaixan ben e inclúense nas dinámicas do día a día"; aínda que lembra que "isto é un ser vivo, que vai cambiando, que os roles se van modificando. Un é máis importante nuns momentos da temporada. Outro xogador dá pasos cara a adiante e convértese noutro xogador importante noutros momentos... Iso é o bo para que todos vaian crecendo e para que esa mellora constante vaia aumentando o nivel medio do equipo e o individual de cada xogador. Ese é o obxectivo e creo que o imos conseguindo".
