Óscar Gilsanz asegurou esta mañá en rolda de prensa que "temos unha gran confianza no traballo deste cadro. Posiblemente sexa un ano no que o traballo dos xogadores é máis importante, que máis e mellor está a traballarse. Nese sentido é bo para ese crecemento dos xogadores".
Despois de perder a pasada fin de semana ante o Valladolid Promesas en Abegondo nun partido que puido caer para calquera dos dous equipos, subliña que "o seu equipo está ben, traballando, con ganas de que chegue o próximo partido como sempre que vés dunha derrota".
Advirte que o UP Langreo, rival este sábado ás 18:00 horas no Novo Ganzábal, "é un dos rivais importantes da categoría. Reforzouse moi ben este ano e mantén un grupo de xogadores con varios anos alí en Langreo".
Ademais, pensa que o conxunto asturiano "adáptase moi ben a diferentes situacións de partido, a diferentes rivais. É capaz de variar a estrutura á hora de presionar, de facer xogo máis combinativo e de xogar aos espazos. Entón é un equipo moi completo, moi ben traballado. A traxectoria que leva como local é moi boa. Trataremos de, utilizando as nosas armas, ser capaces de gañar 3 puntos e de volver ter esas sensacións boas que o equipo está a ter de maneira habitual".
Sobre o céspede sintético do Novo Ganzábal, escenario do encontro, o técnico fabrilista cre que "hai que ter unha adaptación rápida sobre todo a nivel mental. É importante saber que os botes son diferentes, normalmente maiores, que os apoios son diferentes... É certo que estas novas xeracións están afeitas xogar moito en sintético pero hai que adaptarse rapidamente".
Finalmente, preguntado sobre a portería, con Hugo Ríos titular a pasada fin de semana relevando a Brais Suárez, Óscar Gilsanz opina que "temos dúas grandísimos porteiros. Gustaríame que ningún estivese sen xogar aínda que iso é imposible. Trataremos de aproveitar aos dous e que vaian no camiño que están a levar até agora. A competencia que teñen é moi boa e iso fai que os dous vaian mellorando. É o que se persegue".
Recalca en que busca "non tomar decisións que poidan alterar o bo desenvolvemento dos futbolistas. Temos dous grandes porteiros, os dous deben de xogar e trataremos de aproveitar iso".