Pasados dous dos 'cocos' da Liga F, o FC Barcelona e o Atlético de Madrid, o Dépor ABANCA lánzase a por a súa primeira vitoria na categoría mañá domingo 22 de setembro ás 17:00 (Dazn) ante o Real Betis.
As Nosas ocupan a 14ª posición na clasificación esperando sumar os seus primeiros puntos.
Por primeira vez esta temporada, Irene Ferreras tivo a todo o seu cadro na Cidade Deportiva, co regreso das mundialistas Olaya e Marina Artero. Ambas entraron na convocatoria de 20 futbolistas.
A adestradora deportivista asegura que o cadro ten "moitísima ilusión de facer un bo partido que nos permita abrir o marcador de puntos".
Ademais, insiste en que hai "a tranquilidade de saber que isto é moi longo aínda. Acabamos de aterrar nesta Primera División e temos moito que aprender".
As Nosas contan coa baixa de Henar, que segue co seu proceso de recuperación; mentres que Elena Vázquez é a representante de ANOSACANTEIRA.
Si estará Ainhoa Marín, que, recuperada da súa lesión, xa xogou uns minutos a pasada fin de semana no Centro Deportivo Alcalá de Henares ante o Atlético de Madrid e a punto estivo de anotar o gol do empate no minuto 80.
Irene Ferreras explica que "está a adestrar con normalidade. Imos contar con ela e decidiremos se está para iniciar ou é mellor que entre despois. Vai nunha progresión positiva, ten boas sensacións e estamos moi contentos de tela porque suma moito".
Pola súa banda, o Real Betis tampouco puntuou no que vai de liga: caeu coa SD Eibar (2-0) e en casa a pasada fin de semana co Real Madrid CF (0-3).
A técnico branquiazul advirte que "é un equipo que lle gusta iniciar, que quere a pelota, sente cómodo aí, que incorpora moita xente en ataque sobre todo por fóra, que ten moito talento por dentro, con tamén xogadoras coas que coincidín no pasado e que creceron moito. É un equipo perigoso, como todos nesta categoría".
Finalizado o choque, As Nosas adestraranse de novo o luns 23 de setembro ás 11:00 horas en Abegondo.
