O Dépor ABANCA comeza o ano 2025 no Municipal de Adeje ante o UD Costa Adeje Tenerife Egatesa, en partido correspondente á 14ª xornada na Liga F.
As Nosas, que no último choque ligueiro do pasado ano venceron á Valencia Féminas CF (0-2), arrincan en 15ª posición da táboa con 9 puntos.
Fran Alonso asegura que "toda a nosa concentración está en Tenerife. Non pensamos máis aló. Ímolo a afrontar con moita ilusión. É un campo moi complicado, unha superficie distinta", advirte.
Lembra que as dimensións do Municipal de Adeje "son distintas. É un campo bastante máis pequeno, sobre todo en anchura e iso afecta á pelota parada, ás distancias nas basculaciones... Pero acurtamos o campo ao adestrar para axustar o que puidemos".
Insiste en que o Dépor ABANCA afronta o choque "con moitísima ilusión. Fómonos en Nadal con boas sensacións e imos coa idea de tentar traer un resultado positivo".
O corpo técnico ten a todo o seu cadro á súa disposición. "Todas están ben, todas viñeron con moitísima ilusión, traballaron ben durante o Nadal", resume o adestrador deportivista.
Pola súa banda, o UD Costa Adeje Tenerife Egatesa, que no seu último partido caeu en Zubieta ante a Real Sociedad (2-0), é 7º con 17 puntos.
No seu campo esta campaña as tinerfeñas venceron ao Sevilla FC (4-1), Athletic Club (2-1) e Valencia Féminas CF (2-0); empataron co Levante UD (0-0) e Atlético de Madrid (2-2); e caeron co Real Madrid CF (1-4).
Eder Mestre, o seu técnico, advirte que "calquera equipo pode facer dano a calquera. Temos que vivir ese partido entendendo que é un deses marcados no calendario que temos que gañar. Vivilo como unha final é algo que estamos a tentar inculcar despois do volver do parón do Nadal".
Fala de "partido trampa, partido dos que son complicados nos que ambos os equipos nos estamos xogando moito".
O UD Costa Adeje Tenerife Egatesa presentou esta semana a unha fichaxe neste mercado de inverno, a atacante norueguesa Linnea Laupstad.
O Dépor ABANCA realizou un último ensaio esta mañá en Abegondo no campo 8, de herba sintética, "para tentar aclimatar e minimizar as diferenzas", segundo explicou na sala de prensa Fran Alonso.
Finalizada a sesión, As Nosas desprázanse a Tenerife con esta folla de ruta:
Venres 10 de xaneiro
8:30: Adestramento en Abegondo
11:30: Saída da Cidade Deportiva
13:25: Saída de Santiago con destino ao Aeroporto de Tenerife Norte
15:30 (hora local): Chegada ao Aeroporto de Tenerife Norte e aloxamento no Hotel Barceló Tenerife
Sábado 11 de xaneiro
12:00 (hora galega, 11:00 hora local): UD Costa Adeje Tenerife Egatesa - Deportivo ABANCA, no Municipal de Adeje
16:30 (hora local): Saída do voo de Tenerife Norte con destino Galicia
21:30 (hora aproximada): Chegada á Cidade Deportiva de Abegondo
