O Fabril asinou ante o CD Guijuelo (1-0) a súa terceira vitoria consecutiva en Segunda Federación. Decidiu o partido unha xogada de estratexia no minuto 33 nun saque de esquina que liquidou Nsongo Bil.
"Vi ao equipo moi ben, moi traballador", comentou David Lagar, á fronte da dirección técnica. "Imos cara arriba coa humildade de saber que o traballo e a constancia é o camiño para seguir", engadiu o adestrador fabrilista.
Con esta vitoria o filial suma 16 puntos e asómase á zona alta.
Para o encontro ante os salmantinos foron baixa por lesión Álex Pereira, Mardones e Quique Teijo; ademais de Aarón e Kevin Sánchez, finalmente descartados aínda que están na recta final da recuperación das súas lesións.
De novo foron titulares os xuvenís Pablo Garcia, Noé e Adrián Guerrero.
Con todo, o primeiro contratempo chegou para un deles. Pablo García, ao cuarto de hora, viuse obrigado a saír do terreo de xogo debido a unhas molestias na boneca dereita e a clavícula esquerda.
Foi relevado por outro xuvenil, Samuel Fernández Leonardo, que se situou no carril destro no seu debut oficial co Fabril. "Samu pode facelo moi ben tanto de central como de lateral. Para nós é un orgullo que un xuvenil máis debute no Fabril. No día de hoxe comezamos xogando con 3 xuvenís. Fixemos un cambio e entre outro xuvenil. Isto significa que o traballo en Abegondo faise moi ben, desde o Benxamín B ao Fabril B e pasando polo primeiro equipo, como os casos de Barcia, Yeremay e Mella", indicou o preparador fabrilista.
Os primeiros minutos foron igualados ante un CD Guijuelo que transita pola zona baixa da táboa e que chegou a Abegondo con Rubén Gala como novo adestrador.
O primeiro disparo a porta chegou para os fabrilistas case á media hora tras unha boa presión alta. Kike Fernández dispara raso desde a frontal e responde ben o meta Guzmán.
Grazas a unha xogada de estratexia o Fabril púxose por diante aos 33 minutos. Nun saque de esquina, Marotías saca raso para que Nsongo Bil, aproveitando o movemento dos seus compañeiros, remate á rede case na área pequena.
Comezou o filial a crear perigo. Guerrero, escorado en banda esquerda, puido aumentar a renda pero o seu disparo no minuto 42 márchase lixeiramente desviado.
Con 1-0 concluíu unha primeira metade en Abegondo na que "fomos superiores", segundo sostivo David Lagar na rolda de prensa posterior.
Tras o paso polos vestiarios, o CD Guijuelo deu un paso adiante.
Á hora de partido, Carmona rematou no segundo pau libre de marca pero o meta Alberto rexeitou co seu corpo nunha rápida saída.
David Lagar moveu pezas coa entrada de Luisao e Darío Germil por Bil e Noé.
Hugo Villaverde tivo nas súas botas o segundo a falta dun cuarto de hora. Luisao gaña a liña de fondo e o seu centro atrás remátao alto en boca de gol o canteirán branquiazul cando a bancada de Abegondo case o celebraba.
Os últimos minutos foron de certo abafo para os fabrilistas, ademais cun xogador menos polas molestias musculares que sufriu Guerrero e a imposibilidade de relevalo ao esgotar a xanela de cambios.
Iso si, salvando os centros á área buscando algún remate, o CD Guijuelo apenas inquietou a Alberto.
"Facendo un traballo defensivo moi bo soubemos aproveitar as contras para facer situacións de gol como a de Hugo Villaverde", resumiu David Lagar.
A próxima fin de semana, o Fabril visita ao Real Avilés Industrial.
Fabril: Alberto, Pablo García (Samu, min. 15), Damián, Marotías, Íker Vidal, Alfaro, Kike Fernández, Noé (Darío Germil, min. 61), Guerrero, Hugo Villaverde (Dylan, min. 82) e Bil (Luisao, min. 46)
CD Guijuelo: Guzmán, Montes, Ezkurdia (Izan, min. 89), Expo, Mario Robles (Ale Morais, min. 46), Pana (Sillero, min. 71), Cristóbal, Carmona, Garbán, Javi H. e Fran López
Árbitro: Eduardo Rodríguez García, do comité asturiano. Amoestou a Mario Robles (min. 36), Garban (min. 51), Ezkurdia (min. 73), Fran López (min. 80), Luisao (min. 80) e Cristóbal (min. 90). Expulsou con vermella directa a Carmona (90+3)
Goles: 1-0 Bil (min. 33)
Incidencias: partido disputado en Abegondo correspondente á 10ª xornada no grupo 1º de Segunda Federación
