Rosalía Muíño González, máis coñecida como Lía (A Coruña, 13 de febreiro de 2000), renovou o seu contrato polo Dépor ABANCA até 2026. Esta temporada, a futbolista coruñesa xogará cedida no Atlético Villalonga FF de Segunda Federación.
Lía regresou o pasado verán por terceira vez ao Dépor ABANCA, na que é a súa cuarta etapa como branquiazul. Participou en Primera Federación Iberdrola en 14 partidos, ademais doutro en Copa de la Reina.
Lía, que actúa como centrocampista ofensiva, formou parte do cadro inicial en 2016 e das 3 primeiras temporadas de existencia do Dépor ABANCA. Regresou ao comezo da campaña 2020-21 durante a pandemia de COVID-19 e, após abandonar de novo o equipo en xaneiro de 2021, volveu en maio para disputar as últimas xornadas da campaña 2020-21 en Primera Iberdrola.
Formada na canteira do Victoria CF, disputou o primeiro encontro oficial da historia do Dépor ABANCA, o 4 de setembro de 2016 en Ponte dos Brozos fronte ao Oviedo Moderno CF, e formou parte do histórico ascenso a Primera Iberdrola ante o CD Femarguín, o 19 de maio de 2019 na localidade grancanaria de Arguineguín.
Con 102 partidos oficiais, Lía é a quinta xogadora no ranking histórico de aparicións co Dépor ABANCA, só superada por Cris Martínez, Gaby, Iris e Peke.
A centrocampista herculina xogou 29 encontros en Primera Iberdrola, 68 na Segunda División Nacional e 4 no playoff de ascenso a Primera Iberdrola, nos que marcou 13 tantos, todos na categoría de prata.
Entre as súas distintas etapas branquiazuis, Lía defendeu a camiseta do equipo da University South Florida Bulls, a universidade estadounidense onde cursa os seus estudos superiores.
