O Fabril de Manuel Pablo bota a andar mañá domingo 10 de novembro ás 12:00 no Estadio Román Suárez Puerta fronte ao Real Avilés Industrial, en choque correspondente á 11ª xornada na Segunda Federación.
O técnico fabrilista colle as rendas do equipo após subir do Xuvenil A de División de Honra debida á súa vez ao ascenso de Óscar Gilsanz ao Deportivo.
O filial, que a pasada fin de semana venceu ao CD Guijuelo (1-0) con David Lagar á fronte, é 7º na táboa con 16 puntos.
Manuel Pablo aposta pola liña continuista e "por tentar ser un equipo protagonista, como quere calquera adestrador, como era con Óscar. E nada máis, tentar axustar ben as pezas, algúns movementos que poidan ser distintos". "A nivel táctico pouco vai cambiar máis ou menos. Depende tamén dos xogadores que poidas contar en cada fin de semana e nese sentido continuidade", engade.
Son baixa por lesión Álex Pereira; Mardones; Quique Teijo; e os xuvenís Pablo García, cunha escordadura acromioclavicular producido nada máis arrincar o encontro ante os salmantinos; e Noé, cunha lesión muscular nun bíceps femoral.
Completan a convocatoria o xuvenís Guerrero e Mario Hermo.
Pola súa banda, o Real Avilés Industrial, que a pasada fin de semana igualou (1-1) en Pontevedra, é 4º na táboa con 18 puntos.
Os asturianos, que perden a Javi Cueto por sanción, non coñecen a derrota esta temporada no seu campo posto que venceron ao Coruxo FC (2-0), UD Llanera (1-0) CD Laredo (3-0) e Real Ávila CF (2-0); e empataron coa SD Compostela (0-0).
O seu adestrador, Javi Rozada, espera un Fabril semellante con Manuel Pablo: "Tiñan boa dinámica con Óscar Gilsanz pero vén tamén un adestrador de canteira, que estaba a facer as cousas moi ben no Xuvenil. Espérome un equipo similar e sobre todo estas primeiras xornadas que vén co traballo anterior".
Cre que "querá seguir unha liña continuista, respectar o que se traballaba porque ía todo moi ben. Espérome un equipo moi parecido ao que viña facendo en partidos anteriores, que eran moitas cousas ben".
